Judg 20 | MEU | STEP | Bena Israel taudia iboudiai e raka lasi, ibouboudiai na mai lalodia tamona e hebou, Dan amo ela bona Bere-sieba, bona Gilead amo danu, Iehova vairanai e hebou Mispa ai.

Judges 20

Israel ai e tuari heheni

1 Bena Israel taudia iboudiai e raka lasi, ibouboudiai na mai lalodia tamona e hebou, Dan amo ela bona Bere-sieba, bona Gilead amo danu, Iehova vairanai e hebou Mispa ai. 2 Hanua lohiadia iboudiai, Israel iduhudia iboudiai amo, danu e hebou, Dirava ena orea taudia vairadiai: idia na talau domaga-hani, ^{▼▼Domaga-hani = 400,000.} aedia amo e rakava, mai edia dare. 3 Bena Beniamina iduhuna taudia na harina e kamonai, Israel taudia na unu e hebou tomava Mispa ai.

Bena Israel taudia eto, A hamaoromai, ena kara dikana na ede e vara toma? 4 Bena hari Levi tauna, vada e alaia hahinena adavana, ese e haere henidia, eto, Lau na egu hahine ida Beniamina hanuana ta ladana Gibea ai a kau, unuseni ai baia mahuta ato. 5 Bena Gibea taudia na lau ihadikagu totona e tore isi, hanuaboi ai ruma na e koua heḡeḡe, bae alagu mase eto. A egu hahine na e abia bona e hahemaraia; bena vada e mase. 6 Taunabunai, hahine na na abia, tau-anina na utua parara, regena na siaidia, Israel taudia na edia tano ai vada e halaoa tanona idoinai: badina be idia na lebulebu karana bona hemarai karana vada e karaia, Israel bogaraginai. 7 Israel taumui iboumui ai, ba haeroa: emui lalo-hadai bona emui hahedua ba gwaurai hedinarai.

8 Bena hebou taudia e tore isi, tau tamona na heto, eto, Ita ta ena kalaga basinela, bona ta ena ruma basine lou henia. 9 A Gibea na ini baita karaia toma: mari amo baita diba, daika daika ese bae tuari henia. 10 Israel iduhudia iboudiai lalodia amo, sinahu-ta amo gwauta baita abidia hidi, bona daha-ta amo sinahu-ta baita abidia hidi, bona gerebu-ta amo daha-ta baita abidia hidi. Idia na baela, aniani ḡaudia bae ha abi, ina orea taudia adia; bena Gibea ai bae kau negana ai, idia ese Gibea taudia edia kara havara iboudiai Israel bogaraginai vada e kara na davadia do bae henidia. 11 Taunabunai Israel taudia iboudiai na mai lalodia tamona e hebou, una hanua bae tuari henia totona.

12 Bena Israel iduhudia iboudiai ese edia gwau-kau taudia e siaidia, Beniamina iduhuna taudia dekediai, eto, Ena kara dikana bogaragimui ai e vara anina be dahaka? 13 Hari kara havara taudia Gibea ai taodia ba tore, ai ese baia aladia mase, kara havara na Israel bogaraginai baine ore. A Beniamina taudia na tadikakadia Israel taudia eredia asie kamonai.

14 Bena Beniamina taudia na hanua hanua amo ela, Gibea ai e hebou, Israel taudia oredia bae tuari henidia totona. 15 Una dina ai Beniamina taudia hanua hanua amo e hebou na tatau gerebu-rua daha-tauratoi ^{▼▼Gerebu-rua daha-tauratoi = 26,000.} mai edia dare; bona Gibea taudia edia tuari taudia mai goadadia be tatau sinahu-hitu. 16 Ini iboudiai bogaragidiai na ima-lauri taudia mai goadadia sinahu-hitu; idia iboudiai na vilipopo amo nadi bema tahoa, hui autamona basiema reaia. 17 Beniamina iduhuna taudia na unuhohodia; a Israel iduhudia oredia edia tatau na domaga hani ^{▼▼Domaga-hani = 400,000.} mai edia dare. Unu iboudiai na tuari taudia.

Beniamina taudia e kwalimu

18 Israel taudia na e tore isi, Betele ela, Dirava e nanadaia, eto, Edena iduhu bainela guna, Beniamina taudia baine tuari henidia? Iehova eto, Iuda iduhuna baine guna.

19 Daba ai, Israel taudia e tore isi, Gibea vairanai e taruha. 20 Bena Israel taudia ese Beniamina taudia e tuari henidia, Gibea vairanai e gini. 21 Bena Beniamina taudia na Gibea amo e raka lasi, Israel taudia gerebu-rua daha-rua ^{▼▼Gerebu-rua daha-rua = 22,000.} e aladia mase una dina ai. 22 A Israel taudia na e haheauka, tuari gabuna ai ma e gini lou, tuari dinana gini-gunana ai e gini heḡereḡerena.

23 Israel taudia na e dae lao, Iehova vairanai e tai boi; bena idia ese Iehova e nanadaia, eto, Tadikakamai Beniamina taudia ma baia tuari henidia lou eiava? Iehova eto, A tuari henidia. 24 Taunabunai, Israel taudia ese Beniamina taudia ma e tuari henidia lou, dina iharuana ai. 25 Bena Beniamina taudia na Gibea amo ma e raka lasi, dina iharuana ai, Israel taudia gerebu-ta daha-taurahani ^{▼▼Gerebu-ta daha-taurahani = 18,000.} e aladia mase. Unu iboudiai na tuari taudia mai edia dare.

26 Bena Israel taudia, tuari oreana idoinai, na ela, Betele ai e kau, bena e taitai. Idia na Iehova vairanai e helaiva, e vaga una dina ai, ela bona dina e diho. Bena ḡole-oho bouboudia bona herohemaino bouboudia e hahelaḡadia, Iehova vairanai. 27 Bena Israel taudia ese Iehova e nanadaia; badina be unu dinadia ai Iehova ena taravatu mauana na unuseni mia, 28 bona Fineha Eleasara, Aaron tubuna, na una maua vairanai Iehova isiaina e lao heniva unu dinadia ai. Taunabunai idia ese e henanadai, eto, Tadikakamai Beniamina taudia ma baia tuari henidia lou, eiava vada baia hadokoa? Iehova eto, Ma baola; kerukeru umui imamui ai baina atodia.

Beniamina taudia e darere

29 Taunabunai, Israel na edia tuari taudia haida e siaidia, Gibea bae bani henia. 30 Dina ihatoina ai, Israel taudia ese Beniamina taudia ma e tuan henidia, Gibea vairanai ma e gini, nega gunadia heḡereḡeredia. 31 Bena Beniamina taudia na ituari-henidia e raka lasi, hanua na e rakatania; bena nega gunadia heḡereḡeredia idia na e ala-ala matama, Israel taudia haida laolao daladia ai e aladia mase, Betele dalana ai bona Gibea dalana ai, bona tano paka ai danu haida e aladia mase. E aladia taudia na Israel taudia toi-ahui sisivana.

32 Bena Beniamina taudia e hereva heheni, eto, Vairadai vada e darere, nega gunadia heḡereḡeredia. A Israel taudia e hereva heheni, eto, Aita heau, hanua amo baita veridia oho laolao daladia ai.

33 Bena Israel taudia iboudiai na e tore isi, ela, Baal-tamara ai e gini heḡaeḡae; a Israel taudia hahidaosi hanua e bani henia taudia na edia komu gabuna, Geba lahara kahana, amo e heau lasi. 34 Bena tuari taudia mai goadadia gerebu-ta ^{▼▼Gerebu-ta = 10,000.} Israel taudia iboudiai edia amo e abidia hidi na Gibea e tuari henia. Tuari na auka herea; Beniamina taudia danu lalodia asie parara edia darere negana na kahira-kahira. 35 Bena Iehova ese Beniamina taudia e hadareredia Israel vairanai. Israel taudia ese Beniamina taudia gerebu-rua daha-ima sinahu-ta ^{▼▼Gerebu-rua daha-ima sinahu-ta = 25,100.} e aladia mase una dina ai: iboudiai na tuari taudia mai edia dare. 36 Taunabunai Beniamina taudia na lalodia e parara vada e darere.

Israel taudia na Beniamina taudia vairadiai e heau, badina be Gibea ibani-henina vada e siaidia taudia e abidadama henidia. 37 Una negana ai hanua e bani henia taudia e heau lasi haraḡa-haraḡa, Gibea e daea, bena idia ese hanua taudia iboudiai na dare amo e aladia mase. 38 Israel taudia bona hanua e bani henia taudia na edia henega ai toa ta vada e gwauraia guna. Toana binai: lahi kwalahuna ori na heto hanua amo baine dae negana ai 39 Israel taudia na bae gini kerehai tuari ai.

Una negana ai Beniamina taudia ese vada e ala-ala matama, Israel taudia toi-ahui sisivana vada e aladia mase. Bena idia eto, Momokani, idia na vairadai vada e darere, tuari gunana ai heḡereḡerena. 40 A hari toa, lahi kwalahuna, e dae matama negana ai, Beniamina taudia e roha kerehai; madi, hanua idoinai kwalahuna e daeva guba ai. 41 Una negana ai Israel taudia na e gini kerehai; bena Beniamina taudia kudoudia e hetaha, badina be vada e diba vada be dareremu. 42 Taunabunai, idia na Israel taudia vairadia amo e lou, tano gaḡaena ela. A tuari ese e ḡavadia tao, bona hanua amo ema taudia ese edia dala e ginia ahu, bena dare amo e aladia ore. 43 Oibe, idia ese Beniamina taudia e ginidia ahu, bona e hahavadia lao, bona e aladia, Noha amo ela bona Gibea mairiveina kahana ai. 44 Beniamina taudia gerebu-ta daha-taurahani ^{▼▼Gerebu-ta daha-taurahani = 18,000.} e mase, iboudiai na tuari taudia mai goadadia. 45 Ma e kerehai, tano gaḡaena ai e heau, ela bona Rimon nadi-hagana. Daha-ima be laolao daladia ai e aladia mase; oredia ma e hahavadia ela bona Gidomo ai daha-rua ma e aladia mase. 46 Taunabunai, Beniamina taudia una dina ai e mase iboudiai na gerebu-rua daha-ima; ^{▼▼Gerebu-rua daha-ima = 25,000.} iboudiai na tuari taudia mai goadadia, imadia na mai daredia. 47 A tatau sinahu-tauratoi e heau mauri, Rimon nadi-hagana ela, tano ḡaḡaena ai; idia na hua hani Rimon nadi-hagana ai e nohova.

48 Israel taudia na tuari amo e lou, Beniamina taudia ma e ala-ala henidia, taunimanima bona boromakau bona e davari ḡaudia iboudiai e habuadia tari; bona e davari hanuadia na e doudia.